Foto: Astana ákimdigi
«Ustazdarymyzǵa, ustazdyq jolda eńbegi sińgen ardagerlerimizge jáne bilim berý salasynyń ózge de qyzmetkerlerine arnap merekelik konsert uıymdastyryp, eńbegin atap óttik. Mektepter men kolledjderdiń úzdik ustazdary «Qurmetti pedagog» medalimen jáne 1 mıllıon teńgeniń sertıfıkatymen marapattaldy. Qalanyń úsh bilim berý uıymyna (mektep, balabaqsha, kolledj) «Úzdik bilim berý uıymy» ataǵy jáne 10 mıllıon teńgeniń sertıfıkaty tapsyryldy. Ustazdyń eńbegi árqashan baǵaly. Muǵalimder balalarǵa bilim berip qana qoımaı, qabiletin anyqtap, ómirden óz jolyn tabýyna járdem beredi. Pedagogterdiń kásibıligi men óz isine degen janashyrlyǵynyń arqasynda bilimdi jandardyń birneshe býyny qalyptasty», dep jazdy ákim Instagram paraqshasynda.
Osy rette ol Memleket basshysy ustazdar qaýymyna jaǵdaı jasaýǵa jáne qoldaý kórsetýge erekshe nazar aýdaratynyn eske saldy.
«Biz óz tarapymyzdan mektepke qajetti ınfraqurylym salý jumysyn jalǵastyramyz. Prezıdent Qasym-Jomart Toqaevtyń tapsyrmasy boıynsha elordada «Jaıly mektep» ulttyq jobasy júzege asyrylyp jatyr. Osy jumys aıasynda 2024-2025 jyldary 90 myń oqýshy ornyna arnalǵan 24 mektep salynady», delingen jazbada.
Onyń aıtýynsha, 2027 jylǵa deıin bas-aıaǵy 180 myńǵa jýyq oqýshy ornyna arnalǵan 65 mektep salynady. Bul sharalar mektepterdiń shamadan tys júktemesin rettep qana qoımaı, bolashaqta oryn tapshylyǵy máselesin tolyǵymen sheshýge múmkindik beredi.
«Qurmetti pedagogter! Sizderdi kásibı merekelerińiz – Ustazdar kúnimen shyn júrekten quttyqtaımyn! Denderińizge saýlyq, eńbekterińizge tabys jáne baq-bereke tileımin!», dep jazdy Jeńis Qasymbek.
